चिलम तिरईया आगे ना

चिलम तिरईया आगे ना उमा गोसइया आगे ना 2

बइला मा बईठे देखो 2 बइहा आगे ना ||2||

सति के सुरता ले मन बिसराके सुरति मा बसाये हे राम

रति अउ काम देव संतो जुकती जमाये आठो याम

राम रमईया के पइया भोला के अने अवध धाम

राम मा रंगे रामेश्वर एक दुसर ब बड़े नाम

गांजा मा गुंझियागे ना जपन मा सनागे न 2

बईला मा बईठे देखो 2 बईहा आगे ना

चिलम तिरईया आगे ना उमा गोसइया आगे ना

तारका तारे के बेरा आथे देवन भोला ला मनाथे

हिमांचल के बेटी उमा संग मा सुग्घ्घर बिहाव ला मढ़ाथे

साज सिंगार ले संवार के भोला ला दुल्हा बनाथे

भूत परेत हे बराती मंगल जम्मो झन गाथे

नंदी मा भोला छागे ना चंदा हा मुस्कागे ना 2

बईला मा बईठे देखो 2 बईहा आगे ना

चिलम तिरईया आगे ना उमा गोसइया आगे ना

हिमांचल दुआरी मा देखो लागे लागे बरतिया के मेला

कोनो हर हांसे कोनो कुलके कोनो रेके बम भोला

गठे गांजा चलाये कुल्ला बोले देखो दुल्ला दुल्ला

चकरित खागे देख बरतिया राज भर मा होगे हल्ला

श्रृंगी भृंगी नाचे ना नांग गला मा माचे ना 2

बइला मा बईठे देखो 2 बईहा आगे ना

चिलम तिरईया आगे ना उमा गोसइया आगे ना

लगिन बिहाव के नेंग जोग हा संझा के बेरा मा होये

भागर परेहे सातो ठन गा बाये अंग मा कैना सोहे

जावर जोडी अईसे सुग्घर त्रिभुवन के मन मोहे

सुर नर मुनि संग मा किन्नर सुख के बाट ला जोहे

कान्तिकार्तिक पियासे ना मौनी लाला के आसे ना 2

बइला मा बईठे देखो 2 बईहा आगे ना

चिलम तिरईया आगे ना उमा गोसइया आगे ना