चंदन झूलना मां झूलना झूले मोर मईया
चंदन झूलना मां झूलना झूले मोर मईया
फरफर फरफर लाली लाली
लहराये चुनरिया हो,
चंदन झूलना मां झूलना झूले मोर मईया
चंदन के झूलना में सुघर मोतियन हावय सजाए
पुन्नी के रतीहा छिटके चंदैनी शोभा अपन बगराये
सरसर सरसर चलय पुरवइया
महमावे अमरइया हो
चंदन झूलना मां झूलना झूले मोर मईया
झूले झूलना दुर्गा महारानी रुच मुच साज सजाये
चम्पा चमेली अऊ मोगरा के झूलना में सेज बिछाये
मन भर मन भर देवी दुर्गा
सुख पाये मझनया हो
चंदन झूलना मां झूलना झूले मोर मईया
ओढ़े सेज में झूलना ऊपर निदरी माता भजाये
झंझा बेरा में इक्किस बहिनी आ आ के सकलाये
रुमझुम रुमझुम ढोलक मृदंग,
बजवावय बसुरिया हो
चंदन झूलना मां झूलना झूले मोर मईया
निद्री सज के माता दुर्गा जग भर मया लमाये
इक्किस बहिनी गिरे चरण में भाग अपन सहुराये
झर झर झर प्रेम सरग ले,
बरछावे फुलवरिया हो
चंदन झूलना मां झूलना झूले मोर मईया
फरफर फरफर लाली लाली
लहराये चुनरिया हो
चंदन झूलना मां झूलना झूले मोर मईया
✍ लेखक: प्रेम उस्ताद
🎤 प्रस्तुतकर्ता: -
